sabato 30 luglio 2016

Pubblichiamo una poesia di Vittorio Riera

Fantasticaria di menzu austu

E nuru m'apparsi re di la notti
un sonnu ntra li vattali di latti
d'un celu fora d'ogni tempu e spaziu
nni l'abbracciu chi l'arma scunvulgia
di stiddi e planeti supra trazzeri
rutulanti astrali a l'aspettu mutu.
E tu, tu t'adumbravi picciotta
a li sguardi vugghiusi viaggiaturi
di stiddi ncerca e terri mistiriusi
ntra li to' trizzi scuri a suppurtari
l'affannu cuntinu di lu camminu.
Minzogna lu to chiantu tardivu 
lu to duluri e l'orgasmu to privu 
è d'ogni nobbilitati, caruta
nni la luci cavura di la notti
vutti incuta di vinu divinu
a lu surgiri lentu di li forzi.
E fora chiovi nni sta notti d'austu,
stiddi chiovinu a milli faiddi
d'argentu nni lu celu scuru e mutu
specchiu di terri e timpi stirminati
chi lu suli assula comu tavula di mari
quannu manca na vava di ventu.
Avvampa allura lu viola cu l'arsizzi
spini di li cardi chi sparanu culura
ni lu disertu vivu di li corpi
sfatti di ciumi chini di lurdia.
E vidia l'occhiu me vidia tunnu
suli addumari lu scuru vacanti
di celi unni orbi abbruciati di gelu
prieri gridavanu chi nuddu sinteva.
Taliava la luna annacannusi giarna
isati nta l'aria manu stuccati
di lu focu di lu duru travagghiu.
Rivugghiu jocu di focu di stiddi
nto 'n celu mutu spiranzusu biancu
comu pisci saittanti ni lu biveri.
A peri caminava lentu e straccu
'n arcudinuè acchianava pittatu
d'un sulu culuri un culuri novu
c'a l'impruvisu tuttu si rumpeva
si disfacia e iu careva comu
dintra un pozzu nivuru e senza funnu
la testa sbattuliannu contru un muru 
lippusu e cu spuntuna chi mi sfardavanu
li carni d'unni nveci chi sangu
vermi niscevanu a milli bavusi.
Poi fu lu novu suli chi di luci
cummigghiò lu novu iornu.

Nessun commento:

Posta un commento